南京嗰基督

原著：芥川龍之介
转写：赣语通讯社

一

許是一個秋天嗰夜邊，南京奇望街嗰一間屋子內，有位膚色蒼白嗰支那女子，在張舊桌子上半撐嘚面頰，齧齧子盆裡嗰西瓜子。

放且桌上嗰油燈，發出暗暗子個光綫（墨暗嗰光綫幽幽閃動）。話該光照亮哩該房間，倒不如話渠有種可以讓該房間加上忽子陰翳效果嗰能力。壁紙都冽下來嗰房間角腦內，毯子仔未蓋正嗰竹床上，垂下一塊做氣息嗰簾子。再望呀桌子許邊，一把舊椅子跟等（被）人家落刮哩樣個擺且許裡。箇啦，豈汝望哪裏，像樣地忽仔嗰傢俱是一張都冇。

但女子冇所謂，有個連子會停下齧瓜子，擡起冷冷嗰眼珠望注桌子靠到嗰許扇墻。認真一看將會發現，跟前許口折釘上平平整整掛嘚一隻細細仔嗰黃銅十字架。在許上頭，一隻洋絮木頭樣個耶穌高高張開雙手，隱隱浮現出一隻等磨損哩嗰雕像輪廓嗰影子。女子嗰眼珠每次看到耶穌，茫茫睫毛下孤冷嗰眼神就會消失地冇影冇蹤，換之嗰是一種單純嗰希望之光從中生氣勃勃嗰蘇醒過來。但，也就是一瞬間，當目光移開連子，渠總會嘆出氣，黯淡嗰烏色緞子上衣下嗰肩胛像冇所依靠樣低落下去，又架勢齧齧仔下一盆瓜子。

女子喊宋金花，爲哩幫濟屋裏，每工夜裏都且許個房間接客，（是個）十五歲嗰私娼。在秦淮衆多嗰鳳樓中，像金花箇麽熨帖個女子，有是有。但要話客氣方面在箇塊地方有冇有人比得上渠靠實是個問題。渠跟同輩嗰陪酒女吥一樣，既吥話假事也吥作咎，每工夜裏笑笑仔同蔓來箇裏嗰各色客人嬉在一下。撞到渠等多付哩忽仔都會拿畀爺老子去買杯常日不消喫嗰酒，自家還照念覺得開心叻。

金花箇種性狀欸，肯定跟渠個人嗰天性有關係。但是要話箇之外有什哩原因嗰話，就跟牆上掛到嗰十字架所示，渠姆媽從細嗰連子就是咁咁教育渠嗰直到過世，所以話渠自家一直也是信耶穌嗰。

今年開春，且看上海嗰賽馬順便來探尋南支那風光嗰日本後生旅行家在金花房間也有過把人好奇嗰一夜。許刻子渠叼嘚根卷煙，畀金花輕輕抱到膝上，吥意望到墻上嗰十字架，露出怪樣表情，洋不洋土不土嗰問到：

“汝是信耶穌嗎？”

“誒，五歲嗰連子受洗嗰。”

“假啷還做該種事喂？”

將話完，就覺得有種諷刺感覺。但，金花只是把腦殼靠且渠嗰手上，笑笑子露出犬牙。

“因爲若是吾吥做該種生意嗰話，吾爺、吾，都會等餓煞。“

“汝爺老子就上哩年紀嗎？”

“唔 是哦 腰子都直不起來哩。”

“但噻吼，做該種事嗰話不怕上吥到天堂嗰嗎。”

“唔 吥會。”

金花眼珠愣到十字架，眼神好像在深思。

“但是吾是覺得天堂嗰基督爺一定會好心體諒吾。不然話渠就跟姚家巷派出所嗰員警是一路腳色去哩。”

日本後生旅行客笑笑子，若後在上衣暗兜內摸出哩一對翡翠耳環，親手幫渠戴到耳朵下。

“箇本來是吾特勁買歸去日本嗰禮物，就算作是今夜嗰紀念，送把汝吧“

從金花第一轉夜裏接客架勢，渠就相信箇一點，天堂還是會為渠留下一隻位置。

但是就在一個月之前，該個敬虔賣花女也是話不幸染到哩嚴重嗰梅毒，身況病態。聽話該件事嗰相好陳山茶薦渠喫鴉片酒，話對緩解疼痛管用。背路相好毛迎春也特勁帶哩自家服用餘下嗰汞藍丸跟迦路米等帶哩過來。但是金花不曉得什哩回事，把接客停轉下來縮且間裏都冇得好轉。

假有一工陳山茶來金花間裡嬉嗰連子，跟講迷信樣話哩些該樣嗰療法：

“汝嗰病欸是讓客等帶嘚來嗰，所以快寧還把哪個去。咁兩三工肯定就會好轉來。”

金花撐著面頰，照念愁眉苦臉。但到底還是對渠話嗰發哩好奇。

細聲好正問到：“ 認真？“

“是喔。吾姐姐也像汝樣，病啷都好吥到。假啦，一接客，一下就好轉來。”

“假許個客啷樣哩誒？”

“嗚 有忽子造孽，話是都爛到眼珠哩。”

山茶走去之後，金花一個人跪且掛在墻上嗰十字架前，號起腦殼，獻上自家個祈禱。

“在天國個基督爺呐。吾是為哩養到屋裏爺老子將做嗰該些作賤生意。但是除咗臟哩吾自家一個人外吂麻煩到別哪個。所以吾覺得，就算是吾箇嗰樣子死刮，上個都應該是天堂。但是箇個連子嗰吾，只要吾想吥讓客人染到病，就做唄得箇種生意。但咁咁話，就是吾餓死、箇個病也好吥到。吥要跟客人睏一張床上去，吾心裏是曉得嗰。不可能話因為吾自家嗰解放，讓人家會變得不幸。但終歸來話，吾也只是一個女嗰。吥是什哩菩薩吥喫人間煙火。在天上嗰基督爺呀，啷也保佑一下吾吧。除汝之外真嗰冇別人依靠得了哩。”

做好決定嗰宋金花在之後不管山茶跟迎春啷推薦生意過來，擺出個態度都是：

“吥好意思，吥做哩”。

撞到有熟客過來店裏歇叻，除哩一下吸根煙，別嗰要求一概吥答。

“吾身上染到哩蠻犀嗰病，若是挨到吾邊上來，汝也會等染到喂。”

即使該樣，若是有客人吃醉哩話要贖渠自由，渠也會照話實話，事實上渠甚至吥怕等渠等看自家染病嗰證據。所以慢慢子欸，客等就吥到渠間內頭來哩。渠嗰生活也就一工工艱難下去。

該工渠靠且桌子上，號起腦殼發長神，跟先前樣，冇客影，就咁咁挨到哩夜邊，耳朵只聽得到哪只角落嗰蛐蛐聲。冇火炙嗰間裡冷得冰沁骨，從冰冷地石上，冷已然形爲哩一種水樣嗰流體，透進鼠繻子嗰鞋哩、透進鞋裏許雙華奢嗰雙腳。

金花從先刻子就一直望到許墨暗嗰油燈，劈匣轉過神來搲啦子耳朵下嗰翡翠耳環，忍不住打哩隻拶腦。

就在許刻子，漆門等一下推呀開來，一嗰面相做生嗰外國人從口前滂啊進來，噠嘛是勁特加大哩，桌子上嗰油燈焲吖，讓烔紅嗰煤油光且狹狹子嗰間內頭發漲。客人溶且火光中，先向桌子許邊靠哩一下，馬上又企正來，退到背路將進來嗰漆木門許裏，背且門上。

金花跟到企起來，望嘚箇外國人愣到眼珠。客人望起來三十五六樣。斜紋眼嗰茶色西裝、戴頂一樣料子個鳥打帽，眼珠大大，留哩鬍子，曬正裏嗰面頰。但是吧，有只話不通嗰地方是，雖然一眼望去肯定是外國人，吥過是西洋人還是東洋來嗰硬分不清。烏色嗰頭髮從帽子底下擠出來，一邊叼著根滅刮哩嗰煙桿，一邊企嘚門口嗰樣子，啷看都等人覺得像隻喫醉哩酒或者迷哩路嗰人。

“汝好 有什事嘛？”

金花劈匣有種做冷氣嗰感覺，靠企到桌子邊上，帶哩忽子囃人語氣問到。對方擺手，意思是自家話不正土話。若後講哩沏聽不懂嗰外國話。不過，箇轉是金花等背路油燈箇光映到，耳朵上嗰耳環汎出晌晌光，除哩眺腦外也冇別什哩辦法。

噠嘛是看出哩渠嗰迷惑（眉毛都皺到哩），劈匣笑哇出來，拿下帽子放起一邊，慢悠悠子晃到箇邊來。然後轉到桌子許邊嗰椅子子坐正下來。金花對於箇嗰外國人嗰面頰冇什哩印象，但總覺得見過樣，有種親近感覺。客人也不做生，搲哩一掐瓜子到手，但也不喫，祇是望注金花，過哩沏將用種作怪嗰方式帶比劃講些什哩外國話。當然意思渠還是聼吥懂，吥過箇祇外國人對於渠做嗰生意多少還是猜得忽子出。

跟吥會話土話嗰外國人過一夜對於金花來話也吥算什哩稀罕事。許種時候背到椅子子上就是渠嗰一種習慣。一邊打出惹人憐嗰笑面，若後架勢講些其實對方聽吥懂嗰笑話。但是，許客好像聽嘚懂樣，聼哩幾句就笑出哩聲，眼珠子轉嘚比先更開心哩，還架勢比出各種手勢。

客一身作酒氣，但是許嗰彤彤紅叻作飄飄然嗰面頰，等本來冷刮氣息嗰房間都一下烹滾起來樣嗰，充滿哩男客人嗰精神活力。對於金花來話，莫話常日在南京見慣嗰老表等，就從渠一路到而今見過嗰東洋西洋人內來話都要更標緻。但是，不管渠啷想，啷都冇辦法解釋將許種該嗰人原先且哪裏見過嗰感覺。金花眼珠落到客嗰額高，一邊望住渠打捲嗰烏色頭髮，甚至還帶哩忽子曖昧嗰眼神，許刻，渠沏緊力想要尋歸第一轉撞到箇張面嗰記憶。

會吥會是許嗰前幾工跟渠有晌晌壯嗰老婆一下坐船嗰人？唔唔，吥對，許嗰人頭髮顔色更紅嘚子。假噠嘛也有可能是秦淮孔子廟看向照相機拍照嗰許個？不過許嗰人比該客年紀更大嘚子嗰感覺。哦對冇錯，不記得哪刻子在利涉橋邊上嗰飯店面前，人擠人，好像是有隻像該位客嗰人，在揚嘚根粗藤杖打人力車夫嗰背胛。但是吧，總覺得許嗰人嗰眼瞳更青嘚子···

金花還在一直想該件事，邊上一直在打笑面嗰外國人吥曉得哪刻子又掐哩些煙絲到煙槍內頭，呸出作香嗰煙氣來。若後又架勢講話，箇轉渠老哩巴實嗰笑笑子，示出兩根指腦，影且金花面前，擺出：

“做的嗎？” 意思嗰樣子。

兩根指腦代表兩塊銀佬子，不著話哪個人都省嘚懂。

話咯，吥會留客嗰金花啷會答識渠，只是嗑磋嗑磋嚼響瓜子，第二次在面頰上打起笑面，意思就是：

“吥做得”。

一咁，客兩隻手橫橫哩擺呀桌上，醉面穿過墨暗嗰煤油光，眼光捺到渠，若後伸出哩三根指腦，作出好像是在等人回答嗰眼神。

金花輕輕撥哩一下椅子，嘴巴裡含到瓜子，跟恍（Hong）到哩樣。客人好像真嗰是覺得渠兩塊大錢靠實冇法挨到自己身體···。但又話歸來語言不通，就算沏力好正跟渠解釋，真嗰起得到作用嗎？金花調轉腦殼，望到一邊，後悔自家吥好正，冇辦法再一次對客挑起腦殼。

但是對方該嗰外國人呢，一邊笑笑子，稍稍猶豫哩下樣，直接伸出哩四根指腦，再，同渠話哩些什哩外國話。冇辦法金花捂到面頰，其實連打笑面嗰力氣也冇嘅（Gie）去哩。除哩一直斢搖晃嘚腦殼，狠到心等對方作罷。但就咁，客就像在捉什哩眼珠望吥到嗰東西樣，慢慢撐開五隻指腦。

若後兩個人又是拿手比劃又是加上做動作爭刮一沏。在箇之間客人是不依不饒一根根指腦加嘚上去最後連出十美金都冇所大謂樣。但是，在鳳樓中算蠻多去哩嗰十美金也冇動搖金花嗰決心。渠先就企開哩椅子，杵到斜面嗰桌子面前，對方一示出指腦就架勢原地踏步，望起來有忽子焦躁吥安樣。一直斢搖晃嘚腦殼。話時，牆上掛到釘子上嗰十字架一松，跌到哩腳邊嗰地石上，發出細細子嗰金屬聲。

渠關擰伸手畀十字架撿上來。吥意之中，刻在十字架上受難基督嗰面頰上，清楚映出哩嗰是在桌子對面嗰許張外國人嗰面。

“先總是覺得有些東西且哪裡看過嗰這種感覺，應該就是該嗰基督嗰面吧”。

金花畀黃銅十字架抱且自家傳到嗰烏色繻子衣裳上，吥意往隔桌嗰客投去哩驚恐嗰眼神。客嘞 在油燈光下，映襯出帶酒氣嗰面頰，吥時呸出煙來，浮出玩味顏色。此外，渠嗰目光似乎一直在她嗰身影上徘徊–也許是從渠雪白嗰脖頸到渠戴到玉環嗰耳朵。但在金花看來，就算是咁一位客人嗰外表，也充滿哩一種溫和嗰尊嚴。

最終，客人停下哩煙，特勁歪到腦殼，拿講笑嗰語氣話哩些什哩。箇對金花嗰判斷起哩暗示作用，幾乎就像一個聰明嗰催眠師在受試者耳邊話哩些什哩樣。她似乎已經落記哩渠原本堅定嗰決心，笑眯眯嗰眼珠低垂到，邊摸索嘚許個銅十字架，邊羞澀行到許個可疑嗰外國人邊上。

許位顧客還且癡情嘚望著金花企立嗰身影，眼中帶嘚詭異笑意，渠在褲叻嗰兜叻處摸索著，發出叮鈴鐺啷嗰銀腦子聲。但渠眼中嗰莞爾一笑轉面閃出哩熾熱光芒。一下從椅子上跳哇起來，用盡全身力氣畀渠抱進西裝嗰懷裡，可以感受到身上散發出嗰酒味。渠祇能岂任腦殼仰向背路，翡翠耳環同頭髮混夾且一下，內心仿佛已經癱倒。但蒼白嗰面頰上透出一絲血色，早已軟勁嗰眼神傻傻望住迫在鼻尖嗰許張面。莫話，對於是讓箇個陌生嗰外國人解放渠嗰身體，還是切斷渠嗰吻來避免轉移疾病，箇根本冇有思考嗰餘地。當渠嗰嘴巴一邊等客嗰鬍子任其侵犯嗰連子，燒起一沏戀愛嗰舒服感覺，一種渠從未體會過嗰快樂，以一種火熱嗰強度沖入渠嗰心內 ……

二

幾個鐘後，在油燈熄滅嗰間裡，微弱嗰蛐蛐聲讓從床鋪中泄出嗰兩人困覺聲，更加哩忽子寂靜秋意。 而箇期間金花眠哩隻夢，從落滿灰塵嗰床上，如煙般高高升到屋頂瓦上嗰星光月色中。

金花坐且張紫檀椅子上  ，桌上擺到各種菜肴，筷子一伸就是各種：燕窩、魚翼、清蒸蛋（訓GaGa）、熏鯉魚、燉豬肉丸、海參羹——點吥盡嗰菜色望不盡嗰擺桌。 而且，所有碗碟都畫滿哩青蓮花同蔓金鳳凰，同樣精緻嗰還有別些器皿。

在渠椅子背路有一扇掛上哩簾子嗰窗（Kang）子，口前噠嘛是有河流經，一直聽得到靜水淌過跟槳板穿過水體嗰聲音。

箇使得渠，啷都感受到一種從細細連子就見慣嗰，跟原先在秦淮樣嗰情緒。而立刻子渠所處嗰地方，靠實是在天國嗰街市上，就在基督嗰屋裡。

　金花有嗰連子會放下手上嗰筷子，環望桌子周圍。但是且箇麼大隻間內，除左些雕龍柱仂、大大缽菊花等等（被）菜香氣微微圍繞外，一個人影都望吥到。

儘管咁話，桌子一空，就有一道新菜從哪裡帶嘚烹滾嗰香氣送到渠眼前。未想啊，還未等渠來得及放下筷子，一整隻烤野雞就扇嘚翼膀，打翻哩一瓶紹興酒，拂匣拂匣飛到房間嗰天花板上，箇種事。

　就許同時金花察覺到，好像有個人在無聲無息向渠椅子背路行過來。渠照念拿到筷子，關擰望背路眺哩眼。 罷哩在許處啷話，原以為有嗰窗子消失哩，代之是張鋪著緞子嗰紫檀椅子，一個陌生洋人嘴巴邊叼嘚根銅水煙，悠悠閑閑座正在上頭。

　第一眼渠就認出箇個人就是今夜泊來渠間裡許嗰外國人。 唯一跟渠吥同嗰是，在箇洋人頭頂上，有一彎新月樣嗰光環，懸且空中約一尺。 許時，又一大盤滾氣烹烹嗰菜劈匣出現且金花嗰眼前，就跟將從桌子上冒出來樣。 當渠立即拿起筷子正要夾盤中珍味嗰連子，拂匣又想到哩身背許嗰洋人，邊側過肩胛轉面望向渠，好聲話到：

“汝要過來箇邊嘛？”

“唔吥用，汝一個人喫就是。吃刮汝嗰病欸 今夜就會好轉來。”

許位戴到光環嗰洋人，照念把水煙叼且嘴裡，露出無限愛意嗰微笑。

“假 汝真嗰吥喫哩嘛？”

“吾？ 吾不喜歡中國菜喔。汝難道還不曉得吾嗎？耶穌基督未發伊始喫過中國菜。”

　南京嗰基督話完箇句，就慢慢離開哩渠嗰檀木椅子，向嘚金花驚呆嗰面頰，從背路把哩一隻輕而優雅嗰吻。

從天堂醒轉連子，秋天嗰初道曙光已架勢在細狹嗰間內散發出寒意。 但垂下嗰落灰床簾內、細船樣嗰床鋪上到底還是殘留到哩一角溫暖、微弱嗰黑暗。金花半仰到腦，浮且幽暗中，圓圓嗰腮幫等一根分辨吥出顏色嗰舊毯子遮到，睏眼還未睖開。

噠嘛是昨夜發汗嗰緣故，血色蒼白嗰面頰上黏到哩些散亂嗰汗髮，糯米般嗰牙齒從渠唇中隱約漏出。

即使是而今，渠嗰思緒也且回憶菊花、水聲、烤野雞串、耶穌基督同別嗰各種在夢中嗰記憶，一切都還徘徊在渠心中。 但是，當光線逐漸移動到渠床上連子，渠愉快舒服嗰夢境，同眼下旁若無人嗰現實，跟她昨夜交（Qiao）一個難思議嗰洋人且箇張柳床上嗰事，拂―匣讓渠意識明晰起來。

“若是吾傳哩病什哩等把渠……”

金花邊咁樣想，心劈―匣暗沉下來，渠覺得今早晨已經冇法再看渠嗰面。 但渠已然醒轉，更抑住吥到吥知哪刻子將能看到許那張令自家念想嗰、日腦曬過嗰面嗰心情哩。

遲疑哩一沏，渠好正心心睖開眼珠，縮住身子四下望哩圈已等映亮嗰床鋪。但出乎意料嗰是，除哩等毛毯遮到嗰渠之外，吥著話跟十字架上耶穌相像嗰渠，連人影也望吥到。

“噠嘛許也是一隻夢吧。”

渠一下撥刮毯子，重新座起到床上。 若後雙手湊哩下眼珠，撈起得重嗰窗帷，難言嗰眼神轉望向間內。

清早沁冷嗰空氣把間內東西嗰輪廓刻嘚清哩巴楚。一張舊桌子，一盞滅刮嗰燈，還有兩把椅子，一把倒且地上，一把靠且牆上，所有嗰一切跟昨夜照舊。不僅許咁，在散落且桌子上嗰西瓜籽中，甚至還有一隻細細黃銅十字架在發出鈍濁嗰光芒。

金花眨哩下花眼，邊茫然睖住四下，照念作冷樣側身橫睏在舞亂嗰床鋪上。

“到底吥是一隻夢。”

渠邊許咁自言自語連子，遐想各種關於許嗰洋人嗰神秘去向。當然，吥用詳考，渠八瓣子是且自家睏著嗰連子縮出間歸去嗰。但以許種程度擁撫過自家嗰渠，一句再見嗰話都吥惜講就走刮箇種事，話是難以著信，吥如話是冇有承認嗰勇氣。此外渠還落刮哩從許個怪洋人許裡討到話正嗰十塊大錢。

“還是話渠真嗰歸去哩？”

渠緊到沉重嗰胸口，想把脫掟到地毯上自家嗰黑緞外套披上。但當渠嗰手停吖下來，渠嗰面架勢透現出一種生動嗰血色。是聽到哩許扇漆門背路傳來哩洋客人嗰腳步聲嗎？亦或是又且枕腦手巾等上識到嗰渠嗰酒氣息喚起哩昨夜害羞嗰記憶？吥對，金花且箇瞬間注意到哩在渠身上發生嗰奇跡，一夜之間惡性楊梅瘡冇聲冇息嗰痊癒哩。

“許嗰人就是基督爺啦。”

渠失神半裸嘚身子倒匍且冰冷嗰鋪地石上。混雜著重生之主之類嗰詞語，跟聖母瑪麗亞樣，架勢熱切嗰祈禱。

三

第二年春天嗰一隻夜邊，日本後生旅行者再次跟金花在昏暗嗰油燈下隔桌而坐。

“汝還掛到哩十字架啊？“

　許工夜哩，當渠講笑樣嗰話到該嗰連子，金花一下嚴肅起來，架勢跟渠講到許工夜裡降臨到南京嗰基督把渠嗰病診好嗰奇怪故事。

　一邊聽話，日本後生旅行者一個子且心想箇件事。

吾曉得許嗰人。渠許只麼子是日本跟美國嗰混血。名字好像是喊什哩決助·默里（George Murry）什哩嗰。 渠跟吾認嘚嗰一個路透社電報局嗰通訊員相好話渠在南京買過一個基督徒女子過夜，趁渠快睏著嗰連子縮到踱刮哩，話嘚是好像蠻驕傲。吾還記嘚到渠嗰面，上轉來嗰連子且上海將好跟渠住且同一間旅館。渠自話是一家英文報紙嗰通訊員，但長相冇忽男客人嗰樣子，一幅惡相。噠嘛也是從箇嗰女子許裡染過去嗰，麼子背路因為惡性梅毒慢慢子瘋刮哩。但是該嗰女子而今還是認為許嗰無賴混血是耶穌基督。汝話 吾是應該且開導渠嗎？還是應該吥作聲，等渠永遠眠且夢內，就像原先嗰西洋傳說樣···”

　金花話完後，渠擦哩根洋火，仿佛且回憶，喫哩口氣息蠻重嗰捲煙。 然後渠特勁問哩只咁咁嗰問題。

“咁啊。靠實是想吥通欸。就是吼，汝在許之後就再也冇為此煩惱過？”

“嗯，轉都冇。”

金花邊齧齧子瓜籽。面色大晴放光樣，毫吥遲疑嗰回答到。